Babad Lorog

BABAD LOROG

Critane, jaman biyen ning Bandung, adipatine nduweni putra loro. Ananging putra loro mau pada ora akur. Rebutan pangkat. Mula,wektu Adipati Bandung seda, putrane loro mau tukaran, rebutan kedhudhukan, sing akhire dimenangake putra enom.

Putra sing tuwa, bareng kalah karo adine, mlayu nyang Pajang, mbeguru. Ning kono, deweke dijenengke Kyai Bandung. Ning Pajang, Kyai Bandung ngedekake paguran, sing akhire muride akeh. Rumangsa ora krasan Kyai Bandung mlayu nyang Ponorogo dikancani abdine sing setya yaiku Raden Panji Angrangin. Tekan Ponorogo ngadep Bupati Ponorogo. Tujuane ngadep Bupati Ponorogo yaiku arep njaluk lemah dienggo pedhusunan. Akhire Kyai Bandung diwenei lemah ning pesisir kidul yaiku wiwit Kaliwuluh nganti tekan Lorog, lan Panggul nganti Sumbreng.

Bareng wis oleh lemah, Kyai Bandung lan Raden Panji Sanjayangrangin, nerusake laku nyang daerah seng dimaksud Bupati Ponorogo. Bareng wis mlaku rodok suwi, Kyai Bandung leren lan mutusake arep nggawe pasanggrahan dienggo palerenan sauntara. Teka saiki daerah iku isih ana lan kejuluk daerah Sanggrahan.

Bareng Sanggrahan wis reja, Kyai Bandung merintah Raden Panji Sanjayangrangin mbukak alas maneh, ben tambah amba. Tenan, akhire Raden Panji Sanjayangrangin mbukak alas ning cedake gunung Kunir. Sak iki daerah iku dijenengake daerah Nglaran. Maksude, daerah kono iku dieler ben tambah amba.

Ora let suwi, Kyai bandung lan Raden Panji Sanjayangrangin mlaku maneh, njelajah alas, golek lemah sing eloh utawa subur. Ora let suwi, Kyai Bandung tekan Lorog. Neng daerah iku, deweke rumangsa seneng, sebab daerahe subur, lan okeh banyu. Wiwitane, daerah sing di babat yaiku daerah sisih kidul, cedak segara. Tekan saiki, daerah iku isih subur, lan dijenengke daerah Bandung.

Rumangsa wes reja, Kyai Bandung madep maneh nyang Adipati Ponorogo. Pradul nek deweke wis reja neng daerah Lorog. Adipati bungah, lan ngangkat Kyai Bandung dadi Ngabehi. Ananging, Kyai Bandung kudu asok pajeg nyang Ponorogo setahun peng pindo, yaiku ben Mulud lan wulan Sawal.

Bareng wes dadi Ngabehi, Kyai Bandung rabi karo anake Kyai Ageng Jantur. Kyai Ageng Jantur iku kabare rabi karo widadari. Sak jerone omah-omah karo anake Kyai Ageng Jantur, Kyai Bandung nduweni anak papat. Loro lanang lan sing loro wedok. Bareng anake wis padha gedhe, Kyai Bandung nduwe mantu sing asmane Ki Wanapala. Ki Wanapala yaiku putrane Kyai Ageng Klesem.

Salah sawijineng dina, Kyai Bandung ngekon Ki Wanapala mantune mbukak alas dienggo padusunan. Ananging, nganti sedino olehe babat mau ora amba-amba. Mula wektu ditakoni nyang mertuane babagan hasile mbukak alas, Ki wanapala njawab “O.. daya wiyaro bapa”. Entok jawaban kaya ngono mau, Kyai Bandung njawab “sak jane awakmu wis oleh enggon nggo omah-omah. Daerah iku jenengno Wiyara.”. teka saiki daerah iku jenenge isih Wiyoro.

Bareng Kyai Bandung wis sepuh, kekuasaan ning Lorong dicekel mantune, Ki Wanapala. Ananging, Ki Wanapala iku ora adil sak jerone mimpin rakyate, mula akeh rakyat sing ora seneng. Salah sawijineng dina, Ki Wanapala sowan nyang Ponorogo, asok pajek.

Tekan Ponorogo, Ki Wanapala ditakoni Adipati Ponorogo, ngopo Ki Bandung ora sowan dhewe. Ki Wanapala ngabari yen Ki Bandung wis Sepuh. Adipati Ponorogo uga nakoni kenek apa kok dudu anake lanang sing makili. Entuk pitakonan mengkono mau, Ki Wanapala ngapusi yen Ki Bandung ora nduweni putra lanang. Ananging, Adipati Ponorogo ora percaya sebabe ning mburine Ki Wanapala enek bocah sing rupane persis Ki Bandung. Tibake tenan, mburine Ki Wanapala iku enek putrane Ki bandung sing asmana Raden Satria utawa Ki manten. Ngerti ngono, Ki Wanapala isin, wirang. Akhire sing diangkat dadi Ngabehi yaiku Raden Satria.

Ki wanapala bareng wis kisinan ora gelem muleh nyang Wiyoro, nanging uripe enek ngalas. Salah sawijineng dina, Ki Wanapala enek nggunung lan nyumet geni. Uwong sing weruh kukus iku banjur ngerti yen ning kono iku enek uwonge, mestine Ki Wanapala. Bareng diendangi tibake tenan. Nanging Ki Wanapala ora gelem muleh. Pilih urip ning gunung kuwi. Saiki dijenengke gunung Kemukus.

Akhire Ki wanapala seda neng gunung Kemukus. Lha Lorog akhire dipimpin Ki Manten utawa Raden Satria nganti reja.